გუშინ ამერიკის წამლისა და სურსათის ადმინიტრაციამ კეტამინის შემცველი პრეპარატი 'ესკეტამინი' მწვავე დეპრესიის სამკურნალოდ დაამტკიცა.

ახალი პრეპარატი სპრეის სახით იქნება და მისი ბრენდ-დასახელება იქნება Spravato [esketamine].  ის ტაბლეტთან ერთად კომბინაციის რეჟიმში დაენიშნებათ ისეთ პაციენტებს, ვისაც სხვა, აქამდე არსებული სამკურნალო საშუალებები ვერ ეხმარებოდა მწვავე დეპრესიის დაძლევაში. 

იქიდან გამომდინარე, რომ წამალს არაერთი ძლიერი უკუჩვენება აქვს და ავადმოხმარების რისკებიც არსებობს, წამლის დისტრიბუცია მკაცრად გაკონტროლდება: ის მხოლოდ სერთიფიცირებულ ცენტრებში იქნება ხელმისაწვდომი და პაციენტი პირველი საათების განმავლობაში მედიკოსების მკაცრი მეთვალყურეობის ქვეშ იქნება. 

Spravato-ს ანოტაციაში იქნება გაფრთხილება იმაზეც, რომ მიღების შემდეგ პაციენტის სხეული დუნდება, ექმნება ყურადღებისა და კონცენტრაციის პრობლემები, ქვეითდება საღი განსჯის უნარი, პაციენტს, შესაძლოა, თვითმკვლელობის აზრები გაუჩნდეს, არსებობს არადანიშნულებისამებრ მიღების და ავადმოხმარების რისკები.  

ამერიკის წამლისა და სურსათის ადმინისტრაციის მკაცრი კონტროლის მექანიზმი ასევე მოსთხოვს პაციენტსა და დანიშნულების გამომწერ მედიკოსს, რომ მათ ხელი მოაწერონ სპეციალურ ფორმას [Patient Enrollment Form], სადაც გაწერილი იქნება, რომ ამ მედიკამენტის მიღების შემდეგ პაციენტი საჭესთან არ უნდა დაჯდეს იმ დღის განმავლობაში, როცა მედიკამენტი მიიღო. 

არსებობს წამლის მიღების მკაცრი პროტოკოლი: სერთიფიცირებულ კლინიკაში, პაციენტი თვითონ ისხურებს მედიკამენტს, ექიმის მეთვალყურეობის ქვეშ.  მიღების შემდეგ ექიმი ამოწმებს პაციენტს და მხოლოდ მაშინ უშვებს სახლში, როდესაც ჩათვლის, რომ პაციენტს გადაადგილება დახმარების გარეშე შეუძლია. 

მედიკამენტს პაციენტი სახლში ვერ წაიღებს. 

Spravato-ს ეფექტურობა სამი მოკლევადიანი [ოთხკვირიანი] და ერთი გრძელვადიანი კლინიკური ცდების შემდეგ დამტკიცდა. 

ყველაზე ხშირი გვერდითი ეფექტები, რაც პაციენტებს ჰქონდათ კლინიკური ცდების დროს, იყო ძილიანობა, გულისრევის შეგრძნება, შფოთი, ლეთარგიულობა, სისხლის წნევის მომატება, თავბრუსხვევა, საკუთარ სხეულთან გაუცხოების შეგრძნება, ვერტიგო და მსგავსი სიმპტომები.

პრეპარატი მნიშვნელოვან უარყოფით გავლენას ახდენს ქალის რეპროდუქციულ სისტემაზე. ქალმა, ვინც პრეპარატის მიღებას გეგმავს, ორსულობა უნდა გადადოს. 

პრეპარატის მიღების დროს აკრძალულია ჩვილის ძუძუთი კვებაც.  

პრეპარატის მიღება ასევე სარისკოა ისეთი პაციენტებისთვის, ვისაც ჰიპერტენზია ან/და გულის დაავადებები აქვთ.  

ესკეტამინი არის კეტამინის ენანტიომერი. კეტამინი [ბრენდ-დასახელებით Ketalar] ამერიკის წამლისა და სურსათის ადმინისტრაციამ 1970 წელს დაუშვა. 

პრეპარატის ოფიციალური წარმოების უფლება ექნება ფარმაცევტულ კომპანია Janssen Pharmaceuticals, Inc.-ს. 

ფარმაცევტულ კომპანიას წამლის ფასების შესახებ  ინფორმაცია ჯერ არ გაუვრცელებია.

Photo Credit © Janssen Pharmaceuticals, Inc.