2020 წლის 15 ივნისს ამერიკის საკვები პროდუქტებისა და მედიკამენტების ადმინისტრაციამ, F.D.A. გამაფრთხილებელი წერილი გამოსცა და ექიმებს ურჩია, რომ ამერიკული ფარმაცევტული კომპანია "გილეადის" წარმოებული მედიკამენტი რემდესივირი სხვა მედიკამენტებთან - ქლოროქინთან [დელაგილი] ან ჰიდროქსიქლოროქინთან [პლაქვენილი] არ დანიშნონ.

ადმინისტრაციის განცხადებით, რემდესივირის სხვა წამლებთან ერთად დანიშვნა ასუსტებს მის მოქმედებას ახალი კორონავირუსის წინააღმდეგ. 

კლინიკური კვლევები რემდევისირის ახალი კორონავირუსის წინააღმდეგ ეფექტურობაზე გრძელდება. 

2020 წლის 1 მაისს F.D.A.-მ რემდესივირზე საგანგებო გამოყენების / emergency use authorization [EUA] უფლება გასცა. ამ უფლებით, ამერიკის შეერთებულ შტატებში მომუშავე ექიმებს საშუალება მიეცათ, რემდესივირი ინტრავენურად მიეცავთ პაციენტებისთვის, რომლებზეც იყო ეჭვი, რომ ჰქონდათ ახალი კორონავირუსის ინფექცია ან ჰქონდათ ლაბორატორიულად დადასტურებული ინფექცია; მკურნალობა ეხებათ როგორც მოზრდილებს, ასევე ბავშვებს. 

ადმინისტრაციის დასაბუთების ნაწილში წერია, რომ სამეცნიერო მონაცემებსა და საგანგებო რეჟიმით ნებართვის გამოყენების კრიტერიუმებზე დაყრდნობით, ჩაითვალა, რომ რემდესივირი შესაძლოა იყოს ეფექტური ახალი კორონავირუსის სამკურნალოდ; იქიდან გამომდინარეც, რომ არ არსებობს სხვა ადეკვატური, ალტერნატიული და დამტკიცებული სამედიცინო საშუალება ამ სიცოცხლისთვის საშიში ინფექციის წინააღმდეგ, რემდესივირის აქამდე ცნობილი პოტენციური სარგებელი გადასწონის წამლის მიღების პოტენციურ რისკს. 

რემდესივირის უსაფრთხოებისა და ეფექტურობის კვლევა გრძელდება. წინასწარმა მონაცემებმა აჩვენა, რომ პაციენტები, რომლებიც რემდესივირს იღებდნენ, უფრო სწრაფად გამოჯანმრთელდნენ.

ამავე თემაზე:

♦  Lancet-ის კვლევა რემდესივირზე დამაიმედებელი არ არის

♦  NAIAD-მა რემდესივირის კლინიკური წარმატების მთავარი საზომი შეცვალა 

♦  "გილეადის" კვლევა რემდესივირზე დასრულდა

♦  რემდესივირის მცირე წარმატება COVID-19 პაციენტებში

♦  რამდენად ეფექტურია რემდესივირი?