ლექემბი პირველად 2023 წლის 6 იანვარს, დაჩქარებული წესით, დამტკიცდა, რომელიც F.D.A.-ს სამკურნალო საშუალებების დამტკიცების ერთ-ერთი მექანიზმია, რომელიც მარეგულირებელს იმის საშუალებას აძლევს, რომ სამკურნალო საშუალებები დაამტკიცოს ისეთ შემთხვევაშიც კი, როცა ამ წამლის პირდაპირი სამკურნალო ეფექტი იმ დროისთვის არ არის სათანადოდ დამტკიცებული [ამ შემთხვევაში, თავის ტვინში ამოლოიდების ცილების შემცირება], მაგრამ არსებობს გონივრული ეჭვი, რომ შეიძლება ეს კონკრეტული სამკურნალო საშუალება მუშაობდეს - მარეგულირებელი მას დაჩქარებულ რეჟიმში ამტკიცებს ისეთი პაციენტებისთვის, რომლებსაც სხვა, ალტერნატიული, სამკურნალო საშუალება არ აქვთ და მასზე ხელმისაწვდომობის შეზღუდვა, თუნდაც ეფექტურობაზე არასაკმარისი მტკიცებულებების გამო, არ არის ეთიკური. 

წამლის დამტკიცების დაჩქარებული რეჟიმი, დროთა განმავლობაში, - კლინიკური გამოსავლებიდან გამომდინარე, შეიძლება უფრო სარწმუნო [სრულფასოვანი დამტკიცების] რეჟიმში გადავიდეს ან საერთოდ გაუქმდეს, თუკი მისი ეფექტურობა არ დამტკიცდა. 

თავის დროზე, წამლის დაჩქარებულ დამტკიცებასთან ერთად, პოსტ-მარკეტინგული კვლევის ფარგლებში, F.D.A.-მ კომპანიას მოსთხოვა, რომ ლექემბის სავარაუდო კლინიკური სიკეთეები კიდევ უფრო ზუსტად და სტატისტიკურად სანდოდ გადაემოწმებინა/გაეზომა. 

ლექემბის ეფექტურობა მესამე ფაზის რანდომიზებული, პლაცებოთი გაკონტროლებული, კლინიკური კვლევით გადამოწმდა. ამ კლინიკური კვლევის ბოლოს - დაწყებიდან 78-ე კვირას, პლაცებოს ჯგუფთან შედარებით, ლექემბიმ წამლის ჯგუფში სტატისტიკურად მნიშვნელოვანი და კლინიკურად საგრძნობი ეფექტი გამოიწვია პირველადი სამიზნის [primary endpoint] ფარგლებში, რაც იყო დემენციის კლინიკური შეფასების ერთიანი შედეგების შეჯამება [Clinical Dementia Rating].