The Lancet-ის კვლევა რემდესივირზე დამაიმედებელი არ არის





მეცნიერება

The Lancet-ის კვლევა რემდესივირზე დამაიმედებელი არ არის




ეს კვლევა გუშინ სამედიცინო სამეცნიერო ჟურნალ “ლანცეტში” გამოქვეყნდა - Remdesivir in adults with severe COVID-19: a randomised, double-blind, placebo-controlled, multicentre trial 

კვლევამ, რომელიც გუშინ, სამეცნიერო ჟურნალ “ლანცეტში” გამოქვეყნდა, ამბობს, რომ “რემდესივირს” ახალი კორონავირუსით დაავადებულ პაციენტებში მნიშვნელოვანი კლინიკური წარმატება არ ჰქონია. 

ორმაგი-ბრმა, პლაცებო-კონტროლირებადი, მულტიცენტრული კვლევა ჩინეთის 10 კლინიკაში ჩატარდა. ჩინელი მეცნიერები ამბობენ, რომ კვლევა საკმარისი სიმძლავრის არ იყო და საჭიროა კვლევების გაგრძელება ამ მედიკამენტის კლინიკური პოტენციის გასაგებად.  

ამ კვლევაში 236 პაციენტი იღებდა მონაწილებას. ამათგან 158 რემდესივირის ჯგუფი იყო, ხოლო 78 - პლაცებოს, ანუ საკონტროლო ჯგუფი. მედიანური ასაკი იყო 65 წელი; სქესთა გადანაწილება: რემდესივირის ჯგუფში: 89 კაცი და 69 ქალი; ხოლო პლაცებოს ჯგუფში - 51 ქალი და 27 კაცი.

კვლევის ჯგუფის ექიმების თქმით, კლინიკური მდგომარეობის გაუმჯობესების ზოგადი ხარისხი რემდესივირის ჯგუფსა და პლაცებოს, ანუ საკონტროლო ჯგუფს შორის, მნიშვნელოვნად განსხვავებული არ ყოფილა.

 

ვირუსული დატვირთვის შემცირება პლაცებოსა და რემდესივირის ჯგუფებს შორის, The Lancet. გრაფაზე ჩანს, რომ შემცირების მაჩვენებლები ერთმანეთთან ახლოსაა


რემდესივირს მნიშვნელოვნად არ გაუუმჯობესებია არც კლინიკური მდგომარეობა, არც სიკვდილობის მაჩვენებელი და არც დრო, რომლის განმავლობაში პაციენტები ვირუსისგან გათავისუფლდნენ. 

კლინიკური მდგომარეობის გაუმჯობესება პლაცებოს ჯგუფსა და რემდესივირის ჯგუფს შორის დაახლოებით ერთნაირი იყო.  რემდესივირის ჯგუფს ჰქონდა კლინიკური გაუმჯობესების ოდნავ, რიცხოვნულად, უკეთესი მაჩვენებელი, მაგრამ სტატისტიკურად მნიშვნელოვანი არ ყოფილა.

28-დღიანი სიკვდილობის მაჩვენებელი ორივე ჯგუფში ასე გადანაწილდა:  22 [14%] გარდაიცვალა რემდესივირის ჯგუფში, ხოლო 10 ადამიანი [13%]  - პლაცებოს ჯგუფში.

სიკვდილობის მაჩვენებლის განსხვავება რემდესივირისა და პლაცებოს ჯგუფებს შორის, The Lancet.  რემდესივირის ჯგუფში უფრო მეტი პაციენტი გარდაიცვალა, ვიდრე პლაცებოსაში

 

რემდესივირის ჯგუფში მექანიკური სუნთქვის საჭიროება მნიშვნელოვნად განსხვავებული არ იყო: შედარებით მცირე იყო რიცხოვნულად და არა ზოგად-სტატისტიკურად. თუმცა, ზოგადად, ამ კვლევაში მექანიკური  ვენტილაციის საჭიროება პაციენტებში არ ყოფილა. 

ექიმების თქმით, პაციენტებმა რემდესივირის ეს დოზა მარტივად აიტანეს, მაგრამ კრიტიკულ ავამყოფებში კლინიკური მდგომარეობის მნიშვნელოვანი გამოსწორება ვერ მოხდა. რემდესივირის ჯგუფში იყო გარკვეული გაუმჯობესება კლინიკურ პარამეტრებში, თუმცა, მცირე რიცხოვნული და არა მნიშნელოვან-სტატისტიკური.  


 

განსხვავებული შედეგები - NAIAD

უფრო დამაიმედებელი იყო გუშინ ამერიკის ჯანმრთელობის ეროვნული ინსტიტუტის, ალერგიისა და ინფექციის ინსტიტუტის დირექტორის [National Institute for Allergy and Infectious Disease, NIAID], ანტონი ფაუჩის, სიტყვა პრესკონფერენციაზე, სადაც მან აღნიშნა, რომ რემდესივირის შედეგები საიმედოა.  

“მონაცემები აჩვენებს, რომ რემდესივირს აქვს მკვეთრი, მნიშვნელოვანი, პოზიტიური შედეგები გამოჯანმრთელების სისწრაფის თვალსაზრისით, “- თქვა ფაუჩიმ.

ამერიკის ალერგიისა და ინფექციის ინსტიტუტის დაფინანსებული კვლევა რემდესივირზე ჯერ არსად გამოქვეყნებულა, თუმცა, ორგანიზაციის ვებ-გვერდზე წინარე შედეგები მოკლედ არის შეჯამებული.

წინასწარი შედეგების თანახმად, პაციენტებმა, რომლებმაც რემდესივირი მიიღეს, 31%-ით უკეთესი გამოჯანმრთელების მაჩვენებელი ჰქონდათ, ვიდრე პლაცებოს პაციენტებს.  გამოჯანმრთელების მედიანური დრო 11 დღე იყო რემდესივირის და 15 დღე - პლაცებოს პაციენტების შემთხვევაში.  

“მართალია, 31% არ არის 100%-იანი ნოკაუტი, მაგრამ ეს ძალიან მნიშვნელოვანია. დამტკიცდა, რომ ამ წამალს ვირუსის დაბლოკვა შეუძლია,”- აღნიშნა ფაუჩიმ. 

სიკვდილობის უფრო მაღალი შემთხვევა ჰქონდა პლაცებოს ჯგუფს: 11.6 % და რემდესივირის ჯგუფს - 8.0 %. 

 

ამავე თემაზე:


 ♦  "გილეადის" კვლევა რემდესივირზე

♦  რემდესივირის მცირე წარმატება COVID-19 პაციენტებში

♦  რამდენად ეფექტურია რემდესივირი?

მედიაპორტალი © CACTUS-MEDIA.GE

"კაქტუსი" საქართველოსა და მსოფლიოში მიმდინარე ჯანდაცვის, გარემოს დაცვისა, მეცნიერებისა და კულტურის შესახებ მოგიყვებათ.

ვრცლად >>