მეცნიერება

F.D.A.-მ COVID-19-ის სამკურნალოდ მედიკამენტების კომბინაცია Baricitinib + Remdesivir საგანგებოდ დაუშვა




19 ნოემბერს ამერიკის სურსათისა და წამლის ადმინისტრაციამ [F.D.A.] COVID-19-ის გამო ჰოსპიტალიზებული პაციენტების სამკურნალოდ საგანგებო რეჟიმში [Emergency Use Authorization, EUA] დაუშვა ორი მედიკამენტის: Baricitinib-ისა და Remdesivir-ის კომბინაცია ჰოსპიტალიზებული მოზრდილებისა და ორ წელს ზემოთ ასაკის ბავშვებისთვის, უფრო კონკრეტულად კი ისეთი პაციენტებისთვის, რომლებიც საჭიროებენ დამატებით ჟანგბადს, ინვაზიურ მექანიკურ ვენტილაციას, ან ექსტრაკორპორალურ მემბრანულ ოქსიგენაციას [ECMO]. 

კლინიკური კვლევების დროს, ამ კომბინაციის მიღების შედეგად შემცირდა პაციენტების ჰოსპიტალიზების დრო, მკურნალობის დაწყებიდან 28 დღის განმავლობაში იმ პაციენტებთან შედარებით, რომლებიც მხოლოდ პლაცებო + რემდესივირს იღებდნენ. 

საგანგებო დაშვების მიუხედავად, ამ კომბინაციის უსაფრთოებისა და ეფექტურობის კვლევა გრძელდება.  

Baricitinib, ცალკე აღებული, COVID-19-ის მკურნალობისთვის დაშვებული არ არის. 

ამა თუ იმ სამკურნალო საშუალების საგანგებო რეჟიმში დაშვება [emergency use authorization (EUA)] საყოველთაო დამტკიცებას [approval] არ ნიშნავს. სანამ F.D.A. რომელიმე მედიკამენტს საგანგებოდ დაუშვებს, მარეგულირებელი ფრთხილად წონის ხსენებული მედიკამენტის რისკებსა და სარგებელს. თუ ჩაითვალა, რომ სარგებელი უფრო წონადია, ვიდრე რისკი, ან უკეთესი სამკურნალო ალტერნატივა არ არსებობს, მედიკამენტს საგანგებოდ უშვებენ. 

Baricitinib იანუს კინაზის ინჰიბიტორია, რომელიც კონკრეტული ოჯახის ფერმენტებს ბლოკავს და ამ გზით ანთების განვითარებას უშლის ხელს. Baricitinib ტაბლეტის სახით გამოდის, F.D.A.-ს აქამდეც აქვს დაშვებული და იყიდება ბრენდ-დასახელებით Olumiant, საშუალო სიმწვავის რევმატოიდული ართრიტის სამართავად. დღევანდელი საგანგებო დაშვების ფარგლებში, Baricitinib ახალ როლს იძენს: ის ახალი კორონავირუსით გამოწვეული დაავადების მკურნალობისთვისაც უნდა გამოიყენონ. 

Remdesivir ახალი კორონავირუსით გამოწვეული დაავადების მკურნალობისთვის  F.D.A.-მ უკვე დაუშვა 23 ოქტომბერს. მისი ბრენდდასახელებაა Veklury. ანტივირუსული საშუალება Veklury გამოიყენება 12 წლისა და მას ზემოთ მოზარდებისა და უფროსი ასაკის პაციენტებისთვის, რომლებიც 40 კილოგრამზე მეტს იწონიან. Veklury მხოლოდ ისეთი პაციენტებისთვის გამოიყენება, რომლებიც კლინიკაში მკურნალობენ, ასევე ისეთი პედიატრიული პაციენტებისთვისაც, რომლებიც 12 წელს ქვემოთ + ჰოსპიტალიზებულნი არიან და, სულ მცირე, 3.5 კილოგრამს მაინც იწონიან. 

 

ამავე თემაზე:

F.D.A.-მ COVID-19-ის პირველი სამკურნალო საშუალება დაამტკიცა

F.D.A.-მ COVID-19-ის მონოკლონური ანტისხეულებით მკურნალობა საგანგებოდ დაამტკიცა

F.D.A.-მ COVID-19-ის სახლის პირობებში დიაგნოსტიკის სამედიცინო საშუალება დაამტკიცა

მედიაპორტალი © CACTUS-MEDIA.GE

"კაქტუსი" საქართველოსა და მსოფლიოში მიმდინარე ჯანდაცვის, გარემოს დაცვისა, მეცნიერებისა და კულტურის შესახებ მოგიყვებათ.

ვრცლად >>