11 დეკემბერს AstraZeneca-მ გამოაცხადა, რომ რუსული ვაქცინის - Sputnik-ის შემქმნელებთან ერთიანდებიან, რათა ერთად იმუშაონ ახალი კორონავირუსის ვაქცინაზე.

ორივე ვაქცინა ვექტორულია და ადენოვირუსებისგან არის შექმნილი.  ბრიტანული და რუსული ჯგუფი საკუთარ ვაქცინებს გააერთიანებს და ნახავს, როგორ იმუშავებს ორი ვაქცინის კომბინაცია გაერთიანებულად, ადამიანის იმუნიტეტის გასაძლიერებლად.

ხსენებული ორი ვაქცინის კომბინირების ფარგლებში კლინიკური კვლევები 2020 წლის ბოლოს დაიწყება. 

ინფორმაცია ორივე ვაქცინის შესახებ

კატეგორია: მეორე და მესამე, კომბინირებული ფაზა

შემქმნელები: ბრიტანულ-შვედური კომპანია AstraZeneca და ოქსფორდის უნივერსიტეტის სამეცნიერო ჯგუფი

ვაქცინა, რომელსაც ბრიტანულ-შვედური კომპანია AstraZeneca ოქსფორდის უნივერსიტეტთან ერთად ავითარებს, შიმპანზეს ადენოვირუსს ChAdOx1-ს ეფუძნება. მაიმუნებზე კვლევამ აჩვენა, რომ ვაქცინა მათ ვირუსისგან იცავს. მაისში აშშ-ს მთავრობამ პროექტს მხარდასაჭერად 1.2 მილიარდი დოლარი გადასცა. ცდის პირველ და მეორე ფაზაში ვაქცინის შემქმნელებმა მწვავე გვერდითი ეფექტები ვერ აღმოაჩინეს. მათ ნახეს, რომ ვაქცინამ ანტისხეულების გამოყოფა და სხვა იმუნური დაცვის რეაქცია გამოიწვია კორონავირუსის წინააღმდეგ. ვაქცინის მეორე და მესამე კლინიკური ცდის ფაზა ინგლისსა და ინდოეთში დაიწყო, ხოლო, ცდის მესამე ფაზა ბრაზილიაში, სამხრეთ აფრიკაში და აშშ-ში მიმდინარეობს.

აგვისტოში ევროკავშირმა ჯგუფთან შეთანხმებას მიაღწია, რომლის თანახმადაც AstraZeneca ევროპის ქვეყნებს 400 მილიონ დოზა ვაქცინას მიაწვდის, კლინიკური ცდის დადებითი შედეგის შემთხვევაში. AstraZeneca-ს განცხადებით, მან საგანგებო ვაქცინების მიწოდება, შესაძლოა, ოქტომბერში დაიწყოს, - ეს კვლევის შედეგებზეა დამოკიდებული. კომპანია ამბობს, რომ ვაქცინის დამტკიცების შემთხვევაში, წარმოების მოცულობა ორი მილიარდი დოზა ვაქცინა იქნება. India’s Serum Institute-მა უკვე აწარმოა მილიონი დოზა ვაქცინა, რომელთა გამოყენება კლინიკური ცდების დროს იქნება შესაძლებელი.

6 სექტემბერს, AstraZeneca-მ შეაჩერა ვაქცინის გლობალური, მულტიცენტრული კლინიკური ცდა, ერთ-ერთი მოხალისე მონაწილის გამოსაკვლევად, რომელსაც ანთების ერთ-ერთი ფორმა, ტრანსვერსული მიელიტი გაუმწვავდა. ერთ კვირაში ცდები განახლდა. თუმცა, ამ დრომდე აშშ-ში კლინიკური ცდები შეჩერებულია, რადგან ამერიკის საკვებისა და წამლის ადმინისტრაცია [F.D.A.] გამოძიებას განაგრძობს. აქამდე გაურკვეველია, იყო თუ არა ვაქცინის მიზეზი ერთ-ერთი მონაწილის ტრანსვერსული მიელიტის გამწვავება, თუ ის ვაქცინის მიღებას დაემთხვა და  მასთან კავშირში არ არის. ამაზე ინფორმაცია ხსენებული ვაქცინის მწარმოებელ მედიკოსთა ჯგუფს არ გამოუქვეყნებია. 

23 ნოემბერს BBC-მ გამოაქვეყნა ინფორმაცია, რომ ამ ჯგუფის ვაქცინის ეფექტურობის ხარისხია 70%. ჟურნალისტ ჯეიმზ გალაჰერის ინფორმაციით, ეს ვაქცინა უფრო იაფი იქნება, მისი გადატანა/ტრანსპორტირება უფრო მარტივი იქნება და მნიშვნელოვან როლს შეასრულებს პანდემიის მართვაში.

BBC-ის ინფორმაციით, ასევე არსებობს მონაცემები, რომ უკეთესი დოზირების შემთხვევაში, ვაქცინის დაცვის მასშტაბები 90% შეიძლება იყოს. 

კატეგორია: მესამე ფაზა, დამტკიცებულია ადრეული მოხმარებისთვის

შემქმნელი: რუსეთის ჯანმრთელობის დაცვის სამინისტრო და გამელაიას სახელობის კვლევის ცენტრი მოსკოვში

The Gamaleya Research Institute-მა, რომელიც რუსეთის ჯანდაცვის სამინისტროს ნაწილია, ივნისში კლინიკური ცდა დაიწყო ვაქცინისა, რომელსაც ისინი Gam-Covid-Vac-ს უწოდებენ. ის ორი ადენოვირუსის - Ad5 და Ad26 კომბინაციაა, ორივე მათგანი ასევე შეიცავს ახალი კორონავირუსის გენეტიკურ მასალას. ვაქცინა ადამიანის ორგანიზმში ორ ნაწილად შეჰყავთ.  

11 აგვისტოს პრეზიდენტმა ვლადიმერ პუტინმა გამოაცხადა, რომ რუსეთის ჯანდაცვის მარეგულირებელმა მესამე ფაზის კლინიკური ცდის დაწყებამდე დაამტკიცა ვაქცინა, რომელსაც სახელი გადაერქვა და Sputnik V დაერქვა. ვაქცინის ექსპერტებმა ვაქცინის მესამე ფაზის გავლის გარეშე ეროვნულ დონეზე დამტკიცება შეაფასეს, როგორც სარისკო. შედეგად,  რუსეთმა განცხადება შეცვალა და განმარტა, რომ ვაქცინის დამტკიცება „პირობითი რეგისტრაციის სერტიფიკატი“ იყო,  რომელიც იმ შემთხვევაში ამოქმედდებოდა სრულად, თუკი კლინიკური ცდების მესამე ფაზა დადებით შედეგებს აჩვენებდა. ეს ცდა თავდაპირველად 2 ათას მოხალისის მონაწილეობას ითვალისწინებდა, მოგვიანებით, მონაწილეთა რაოდენობა 40 ათასამდე გაიზარდა. 4 სექტემბერს, პუტინის განცხადებიდან 3 კვირის შემდეგ, Gamaleya-ს მკვლევრებმა პირველი და მეორე ფაზის ცდის შედეგები გამოაქვეყნეს. მცირე კვლევით მათ აღმოაჩინეს, რომ Sputnik-ის გამოყენებით კორონავირუსის წინააღმდეგ ანტისხეულების გამოყოფა ხდება და მას მსუბუქი გვერდითი მოვლენები ახლავს. ამასობაში, რუსეთი მთელ რიგ ქვეყნებს, მათ შორის, ბრაზილიას, მექსიკას და ინდოეთს შეუთანხმდა, რომ ვაქცინით მოამარაგებდა.