F.D.A.-ის საკონსულტაციო საბჭომ COVID-19-ის სამკურნალო აბს რეკომენდაცია გაუწია





მეცნიერება

F.D.A.-ის საკონსულტაციო საბჭომ COVID-19-ის სამკურნალო აბს რეკომენდაცია გაუწია




გუშინ ა.შ.შ. სურსათისა და წამლის ადმინისტრაციის [F.D.A.] დამოუკიდებელმა საკონსულტაციო საბჭომ რეკომენდაცია გაუწია COVID-19-ის სამკურნალო აბს, რომელსაც ფარმაცევტული კომპანია Merck აწარმოებს და რომელიც პირველი აბი იქნება ახალი კორონავირუსით გამოწვეული ინფექციის წინააღმდეგ, თუკი დამტკიცდა. 

საკონსულტაციო საბჭოს 13-მა წევრმა დადებითი რეკომენდაცია გასცა, ხოლო 10-მა - უარყოფითი. 

მედიკამენტს “მოლნუპირავირი” ჰქვია და მან სიკვდილიანობა და ჰოსპიტალიზება მხოლოდ ზომიერად შეამცირა. ამერიკის შეერთებული შტატების სამედიცინო მარეგულირებელმა, შესაძლოა, რამდენიმე დღეში დაუშვას ეს მედიკამენტი - ჯერ ის არც ერთი რეჟიმით დამტკიცებული არ არის. 

მომავალ კვირებში F.D.A.-მ, შესაძლოა, Pfizer-ის აბიც დაამტკიცოს, რომელიც უფრო ეფექტური ჩანს. დამტკიცების შემთხვევაში, ეს უკვე ორი აბი იქნება COVID-19-ის სამკურნალოდ.

პანელის აზრით, ეს მედიკამენტი ისეთი პაციენტებისთვის იქნება გამოსადეგი, რომლებიც მწვავედ ავად გახდომის რისკის ქვეშ არიან.

“ამ მედიკამენტის ეფექტურობა მაღალი და დადებითია,” - უთხრა “ნიუ იორკ თაიმზს” დეივიდ ჰარდიმ, ინფექციური დაავადების სპეციალისტმა, რომელიც ლოს-ანჯელესში მუშაობს. მან ხმა მედიკამენტის დამტკიცებას დაუჭირა, რადგან ფიქრობს, რომ “მსგავსი რამე საჭიროა.”

კომიტეტის სხვა წევრებმა, რომლებმაც აბის დამტკიცებას მხარი არ დაუჭირეს, ამბობენ, რომ მეტი კვლევა უნდა ჩატარდეს ამ მედიკამენტის უსაფრთხოების შესამოწმებლად.
 
აბი, რომელსაც ექიმები გამოწერენ და აფთიაქებში იქნება ხელმისაწვდომი, უფრო მოსახერხებელია, ვიდრე ვენაში გადასასხმელი სამკურნალო საშუალებები, - მონოკლონური ანტისხეულები, რომლებსაც ასევე უსხამენ მაღალი რისკის მქონე COVID-19 პაციენტებს. ანტისხეულებით მკურნალობა ძვირია და ჩვეულებრივ სტაციონარულ პირობებში უსხამენ პაციენტებს. 
 
კლინიკური კვლევების ფარგლებში, “მერკის” აბი ისეთ პაციენტებში გამოიცადა, რომლებიც ინფიცირებულნი იყვნენ ახალი კორონავირუსის დელტა, მუ და გამა ვარიანტებით.
 
 
შემცირებული ეფექტიანობა
 
27 ნოემბერს ფარმაცევტული კომპანია “მერკის” ექსპერიმენტულმა მედიკამენტმა მნიშვნელოვნად დაბალი ეფექტურობა გამოავლინა ჰოსპიტალიზაციისა და სიკვდილიანობის შემცირებაში. 

“მერკმა” პარასკევს განაცხადა, რომ კლინიკურ კვლევაში მოლნუვირაპირმა 30%-ით შეამცირა ჰოსპიტალიზება და სიკვდილიანობა პლაცებოს ჯგუფთან შედარებით, სადაც 1 400-ზე მეტი პაციენტი იღებდა მონაწილეობას.

უფრო ადრინდელმა კლინიკური კვლევის მონაცემებმა, რომელიც 775 პაციენტის მონაცემის ანალიზს მოიცავდა, აჩვენა, რომ ამ პარამეტრების შემცირების მაჩვენებელი “დაახლოებით” 50 პროცენტი იყო. 

ახალი კლინიკური კვლევის მონაცემების მიხედვით, "მოლნუპირავირის" ჯგუფში ერთი ადამიანი გარდაიცვალა, ხოლო პლაცებოს ჯგუფში - 9. 

"მერკმა" ა.შ.შ. სამედიცინო მარეგულირებელს მოლნუპირავირის დამტკიცებისთვის 11 ოქტომბერს მიმართა. 

 

ასევე დაგაინტერესებთ → ახალი კორონავირუსის სამკურნალო საშუალებების ცნობარი 

მედიაპორტალი © CACTUS-MEDIA.GE

"კაქტუსი" საქართველოსა და მსოფლიოში მიმდინარე ჯანდაცვის, გარემოს დაცვისა, მეცნიერებისა და კულტურის შესახებ მოგიყვებათ.

ვრცლად >>