F.D.A.-მ COVID-19-ის სამკურნალო პირველი ანტივირუსული აბი დაამტკიცა





მეცნიერება

F.D.A.-მ COVID-19-ის სამკურნალო პირველი ანტივირუსული აბი დაამტკიცა




ა.შ.შ. სურსათისა და წამლის ადმინისტრაციამ [F.D.A.] დღეს დაამტკიცა პირველი აბი COVID-19-ის სამკურნალოდ - პაქსლოვიდი, რომელიც ძალიან ეფექტურია მწვავე დაავადების პრევენციის თვალსაზრისით.

აბს ფარმაცევტული კომპანია “პფაიზერი” აწარმოებს და ის 12 წლისა და უფროსი ასაკის მოქალაქეებისთვის დაიშვა. აბი იქნება ისეთი პაციენტებისთვის, რომლებიც მწვავე დაავადების განვითარების რისკის ქვეშ არიან და აქვთ ისეთი თანმდევი დაავადებები, როგორიცაა სიმსუქნე ან დიაბეტი. 

“პფაიზერის” ლაბორატორიულმა გამოკვლევებმა აჩვენა, რომ ეს აბი, სავარაუდოდ, ომიკრონის წინააღმდეგაც იქნება ეფექტური.

მკურნალობის რეჟიმი ითვალისწინებს 30 აბის მიღებას 5 დღის განმავლობაში. პაციენტები მიიღებენ ორ აბ პაქსლოვიდს და ერთ აბ რიტონავირს, კომბინაციაში, რომელიც H.I.V.-ის სამკურნალოდ გამოიყენება.

კლინიკურმა კვლევებმა აჩვენა, რომ პაქსლოვიდი ეფექტური იყო ინფექციის შეყრიდან მალევე მიღების შემთხვევაში. დელტა ვარიანტის შემთხვევაში მისი ეფექტურობა ჰოსპიტალიზაციისა და სიკვდილიანობის შემცირების საქმეში იყო 88 პროცენტი. კლინიკური კვლევა არავაქცინირებულ, მწვავე დაავადების განვითარების მაღალი რისკის მქონე პაციენტებში ჩატარდა. 

პაქსლოვიდი ბევრად უფრო ეფექტური ჩანს კონკურენტ აბ მოლნუპირავირთან შედარებით, რომლის მწარმოებელი “მერკია” და რომელიც ასევე ელოდება მარეგულირებლის გადაწყვეტილებას COVID-19-ის სამკურნალოდ დასაშვებად. ბოლო კლინიკური კვლევიდან გამომდინარე, რომელიც კომპანიამ მარეგულირებელს წარუგინა, მოლნუპირავირის ეფექტურობა ჰოსპიტალიზაციისა და სიკვდილისგან დაცვის თვალსაზრისით მხოლოდ 30 პროცენტი იყო. 

 

♦ ასევე წაიკითხეთ → ახალი კორონავირუსის ინფექციის სამკურნალო საშუალებების ცნობარი

მედიაპორტალი © CACTUS-MEDIA.GE

"კაქტუსი" საქართველოსა და მსოფლიოში მიმდინარე ჯანდაცვის, გარემოს დაცვისა, მეცნიერებისა და კულტურის შესახებ მოგიყვებათ.

ვრცლად >>