F.D.A.-მ COVID-19-ის სამკურნალოდ მეორე ანტივირუსული აბი დაამტკიცა





მეცნიერება

F.D.A.-მ COVID-19-ის სამკურნალოდ მეორე ანტივირუსული აბი დაამტკიცა




დღეს ა.შ.შ სურსათისა და წამლის ადმინისტრაციამ [F.D.A.] COVID-19-ის სამკურნალოდ მეორე ანტივირუსული აბი საგანგებო რეჟიმში დაამტკიცა.

აბს მოლნუპირავირი ჰქვია და მას ფარმაცევტული კომპანია “მერკი” აწარმოებს. 

მოლნუპირავირი მსუბუქი და საშუალო სიმძიმის პაციენტებისთვის უნდა გამოიყენონ, რომლებსაც ინფექციის გამწვავების, - მათ შორის ჰოსპიტალიზაციისა და სიკვდილის, მაღალი რისკები აქვთ და მათთვის, რომელთათვის F.D.A.-ს მიერ აქამდე დაშვებული სამკურნალო საშუალებები ან არ არის ხელმისაწვდომი, ან მათი მიცემა კლინიკურად არ არის გამართლებული და სასარგებლო.

აბი მხოლოდ რეცეპტით გაიცემა და მისი მიღება COVID-19 დიაგნოსტირებიდან 5 დღის განმავლობაში არის რეკომენდებული. მოლნუპირავირი 18 წელზე უმცროსი ასაკის მოქალაქეებისთვის არ არის დაშვებული, რადგან მან, შესაძლოა, ძვლის სისტემის ზრდას შეუშალოს ხელი. 

"მერკის" სამკურნალო აბი შემდეგნაირად მუშაობს: ის ვირუსის გენეტიკაში აღწევს და იქ გარკვეულ ცვლილებებს იწვევს, რის შედეგადაც ვირუსის რეპლიკაციას უშლის ხელს. მუშაობის ამ მექანიზმის გამო, მეცნიერთა ნაწილი ფიქრობს, რომ ამ აბმა პაციენტებში, შესაძლოა, რეპროდუქციული პრობლემები გამოიწვიოს.

ცხოველებზე შესწავლის შედეგად დადგინდა, რომ მოლნუპირავირი, შესაძლოა, სასიკვდილო იყოს ორსულებისთვის. შესაბამისად, ის არ ინიშნება ორსულობის დროს. ორსულებს მოლნუპირავირი მხოლოდ უკიდურეს შემთხვევაში და მხოლოდ ექიმის გადაწყვეტილების შემდეგ შეიძლება დაენიშნოთ - მაშინ, როცა მისი სარგებელი გადასწონის არსებულ რისკებს. 

"მერკს" ჯერ არ გამოუქვეყნებია ლაბორატორიული კვლევების შედეგები იმასთან დაკავშირებით, თუ როგორ მუშაობს მოლნუპირავირი ახალი კორონავირუსის ახალი ვარიანტის - ომიკრონის წინააღმდეგ.

გუშინ ა.შ.შ. მარეგულირებელმა სხვა კომპანიის - "პფაიზერის" აბი - პაქსლოვიდიც დაამტკიცა COVID-19-ის სამკურნალოდ, რომელიც პირველი აბი იყო ამ მიმართულებით. 

F.D.A.-ს აქამდეც ჰქონდა დამტკიცებული COVID-19-ის სამკურნალო საშუალებები [რემდესივირი, მონოკლონური ანტისხეულები, ტოცილიზუმაბი], მაგრამ ყველა მათგანი ან ინექციას საჭიროებდა, ან ვენაში გადასხმას და რთული იყო მისი ადმინისტრირება. 

ანტივირუსული აბების - პაქსლოვიდისა და მოლნუპირავირის დამტკიცება კი იმით არის მნიშვნელოვანი, რომ ისინი პირველი ანტივირუსული ორალური აბებია COVID-19 სამკურნალოდ და მათი გამოყენება პაციენტისთვის უფრო მარტივია.

 

♦ ასევე წაიკითხეთ → ახალი კორონავირუსის ინფექციის სამკურნალო საშუალებების ცნობარი

მედიაპორტალი © CACTUS-MEDIA.GE

"კაქტუსი" საქართველოსა და მსოფლიოში მიმდინარე ჯანდაცვის, გარემოს დაცვისა, მეცნიერებისა და კულტურის შესახებ მოგიყვებათ.

ვრცლად >>