2018 წლის 25 ივნისს ამერიკის წამლისა და სურსათის სააგენტომ [Food and Drug Administration, FDA] მარიხუანას ერთ-ერთი ბუნებრივი კომპონენტის - კანაბიდიოლის ექსტრაქტი [cannabidiol (CBD)] სამედიცინო მოხმარებისთვის დაუშვა.

ახალი სამკურნალო საშუალება ორი წლისა და უფროსი ასაკის ბავშვებში ორი იშვიათი სახეობის ეპილეფსიის თანმხლები გულყრების სამკურნალოდ უნდა გამოიყენონ. 

კანაბიდიოლი 80 აქტიური ქიმიური კომპონენტიდან ერთ-ერთია, რომელსაც მარიხუანა ბუნებრივად შეიცავს.  

ამერიკის წამლისა და სურსათის სააგენტო წლების განმავლობაში უწყობს ხელს მარიხუანასა და მისი ცალკეული კომპონენტების კლინიკურ კვლევებს და მკაცრი კონტროლის დაცვით, დაინტერესებულ მწარმოებლებს ამ მცენარის სასარგებლო თვისებების გამოვლენაში ეხმარება.   

“კანაბიდიოლის სამკურნალოდ დაშვება დიდი სამედიცინო წინსვლაა. მნიშვნელოვანია იმის გააზრებაც, რომ ეს არ ნიშნავს თვით მარიხუანას დამტკიცებას სამკურნალოდ - ეს არის მისი ერთ-ერთი კომპონენტის [CBD-ს] დამტკიცება სამედიცინო მიზნებით, რომელიც ერთ კონკრეტულ პრობლემას კურნავს.  

მნიშვნელოვანია იმის გააზრებაც, რომ დაშვებული სამკურნალო საშუალება სუფთა სახის კანაბიდიოლია. ის პაციენტებს მკაცრად განსაზღვრული დოზებით ეძლევათ იმისთვის, რომ კონკრეტული მოსალოდნელი შედეგები მიიღონ,” - განაცხადა ამერიკის წამლისა და სურსათის სააგენტოს წარმომადგენელმა სკოტ გოტლიბმა განცხადებაში, რომელიც სააგენტოს ვებ-გვერდზე 25 ივნისს გამოქვეყნდა.  

მისივე თქმით, უკვე წლებია, რაც ამერიკის წამლისა და სურსათის სააგენტო დაინტერესბულია მარიხუანასა და მისი აქტიური კომპონენტების სამკურნალო თვისებების კვლევით. თუმცა, ჯერ-ჯერობით მარიხუანა ამერიკის შეერთებული შტატების მიერ კლასიფიცირებულ ნივთიერებათა Schedule I სიაში შედის.  

ნივთიერებების, წამლებისა და ქიმიკატების Schedule I სიაში ისეთი საშუალებები შედის, რომლებიც სრულიად აკრძალულია: სამედიცინო გამოყენებისთვის არ არის დაშვებული და დამოკიდებულების მაღალ რისკებს შეიცავს. 

კანაბიდიოლის უკანონო რეკლამირება და გაყიდვა

ამერიკის წამლისა და სურსათის სააგენტო აფრთხილებს პაციენტებს: ბევრი უკანონო მწარმოებელი ყიდის თითქოს მარიხუანას სხვადასხვა ექსტრაქტებს ზეთების, კაფსულების, სიროპის, ჩაის, ტროპიკული ლოსიონისა და კრემების სახით.  

არალიცენზირებული მწარმოებლები მომხმარებლებს ატყუებენ და ეუბნებიან, რომ ეს პროდუქცია მომაკვდინებელ დაავადებებს კურნავს, მათ შორის, სიმსივნეს. თუმცა, მათ ამ მტკიცებას არავითარი სამეცნიერო მტკიცებულება არ უმაგრებს ზურგს.

“უცნობმა ნივთიერებამ, რომელიც შავ ბაზარზე გასაღებულია, როგორც კანაბიდოლი,  შეიძლება პაციენტებს იმედი გაუცრუოს ნივთიერების მიმართ, რომელსაც სამედიცინო კვლევებით დამტკიცებული დადებითი შედეგები მოაქვს,” - ამბობს სკოტ გოტლიბი.  

მცენარეული სამკურნალო საშუალებების კვლევა

ამერიკის წამლისა და სურსათის სააგენტოს სპეციალურად გამოყოფილი ბოტანიკოსების ჯგუფიც ჰყავს, რომლებიც მხოლოდ მცენარეული საშუალებების კვლევით არიან დაკავებულნი და მწარმოებლებს შესაბამის სამეცნიერო მასალებს აწვდიან.

მათი კვლევის ერთ-ერთი სამიზნე მარიხუანაა.  

ამ ჯგუფმა 2016 წლის დეკემბერს გაიდლაინიც კი გამოაქვეყნა მცენარეებისგან სამკურნალო საშუალებების მწარმოებლებისთვის.  

მარიხუანას Schedule I სიიდან ამოღებას არაერთხელ მოითხოვდნენ სხვადასხვა ჯგუფები. 1972 წლიდან დღემდე, ყველა ასეთ მოთხოვნაზე ამერიკის წამლის რეგულირების ადმინიტრაციამ [Drug Enforcement Administration, DEA] უარყოფითი გადაწყვეტილება მიიღო.

ბოლო წლებში, FDA-მ არაერთხელ მიმართა ამერიკის წამლის რეგულირების ადმინიტრაციას Schedule I სიაში მყოფ საშუალებებზე სამეცნიერო კვლევის ლიცენიების გაცემის რეკომენდაციისთვის.  

სკოტ გოტლიბის თქმით, კანაბიდიოლის სამედიცინო დაშვება დასამაბს მისცემს მარიხუანას სხვა კომპონენტების კვლევასა და სამედიცინო მიზნებით დაშვებას, რაც ბევრ პაციენტს მოჰგვრის შვებას მომავალში.